இயேசு பிறப்பின் உணர்வலைகள் ஏழு
அருள்தந்தை தம்புராஜ் சே.ச.
இயேசுவின் பிறப்பைப் பற்றிய செய்தியைப் பெற்றவர்களிடம் கீழ்வரும் 7 உணர்வலைகள் ஆசையவாடியதை நாம் காண முடிகிறது.
1.நிகழ்ச்சி 2.காட்சி 3.மகிழ்ச்சி 4.மாட்சி 5.எழுச்சி 6.புகழ்ச்சி 7. சாட்சி.
இயேசுவின் பிறப்பைப் பற்றி விவரிக்கும் புனித மத்தேயு ”இயேசுவின் பிறப்பையொட்டிய ”நிகழ்ச்சிகள்” என்ற வர்ணிக்கத் தொடங்குகிறார்.
நற்செய்தியாளர் யோவான் இம்மாபெரும் நிகழ்ச்சியை ”வாக்கு மனிதர் ஆனார்: நம்மிடையே குடிகொண்டார்” என அதிசயத்தைப் பற்றிக் கூறுகின்றார்.
இயேசு பிறந்ததும் அது மாபெரும் காட்சியாகக் கீழ் வரும் நபர்கள் காண்கிறார்கள். அன்னை மரியாள் இறைமகன் தனது மடியில் தவழ்வதைக் காண்கின்றார். யோசேப்பு, இடையர்கள், மூன்று இராஜாக்கள், சிமியோன், அன்னா போன்றவர்களும் இக்காட்சியைக் கண்டு மகிழ்கின்றனர்.
அன்னை மரியாள் எலிசபெத்தைச் சந்தித்தபொழுது, தன் கருவறையில் இயேசுவைத் தாங்கி வந்தால், எலிசபெத்தின் குழந்தை யோவான் அவள் வயிற்றிலிருந்தே ”மகிழ்ச்சியால் துள்ளியது”. (லூக்கா 1:41)
மரியாவும் போற்றிப் புகழும் பாடலில் ”என் மீட்பராம் கடவுளை நினைத்து எனது மனம் பேருவகைக் கொள்கிறது”(லூக்கா 1:47) என்று மகிழ்ச்சியில் திளைக்கின்றார்.
வானதூதரணி இடையர்களுக்குத் தோன்றி ”அஞ்சாதீர்கள். இதோ எல்லா மக்களுக்கும் பெரும் மகிழ்ச்சியூட்டும் நற்செய்தியை உங்களுக்கு அறிவிக்கின்றேன்” என்றது (லூக்கா 2:10)
லூக்கா நற்செய்தியின்படி ”ஆண்டவருடைய தூதர் அவர்கள் முன் (இடையர்கள்) வந்து நின்றபோது ஆண்டவரின் மாட்சி அவர்களைச் சுற்றி ஒளிர்ந்தது” (லூக்கா 2:9)
யோவானும் தனது நற்செய்தியில் மாட்சியைப் பற்றிப் பேசுகிறார். ”அவரது மாட்சியை நாங்கள் கண்டோம். அருளும் உண்மையும் நிறைந்து விளங்கிய அவர் தந்தையின் ஒரேமகன் என்ற நிலையில் இம்மாட்சியைப் பெற்றிருந்தார்”.(யோவான் 1:14)
சிமியோன் குழந்தை இயேசுவை கையிலேந்தி, ஆசி கூறி: ”இதோ இக்குழந்தை இஸ்ரயேல் மக்களுள் பலரின் வீழ்ச்சிக்கும் எழுச்சிக்கும் காரணமாக இருக்கும் என்றார். (லூக்கா 2:34)
இயேசுவைக் கருத்தரித்த மரியா ”என் ஆண்டவரை எனது உள்ளம் போற்றிப் பெருமைப்படுத்துகின்றது. என் மீட்பராம் கடவுளை நினைத்து எனது மனம் பேருவகை கொள்கின்றது” என புகழ்ச்சிப் பாடல் பாடுகிறன்றார் (லூக்கா 1:47)
இடையகள் குழந்தை இயேசுவைக் கண்டபின் தாங்கள் கேட்டவை, கண்டவை அனைத்தையும் குறித்துக் கடவுளைப் போற்றி புகழ்ந்து பாடிக் கொண்டே திரும்பிச் சென்றார்கள்.” (லூக்கா 2:20).
84 வயதான அன்னாவும் குழந்தை இயேசுவைக் கண்டபின் ”கடவுளைப் புகழ்ந்து நன்றி கூறிகின்றார். (லூக்கா 2:38)
இடையர்கள் ”அந்தக் குழந்தையைப் பற்றித் தங்களுக்குச் சொல்லப்பட்ட செய்தியைத் தெரிவித்தார்கள்” என்று சான்று பகர்ந்ததை லூக்கா 2:17ல் காணலாம். அதைக் கேட்ட யாவரும் இடையர்கள் தங்களுக்குச் சொன்னவற்றைக் குறித்து வியப்படைந்தனர்.
அன்னாவும், குழந்தைஇயேசுவைக் கண்டபின் ”எருசலேமின் மீட்புக்காக காத்திருந்த எல்லாரிடமும் அக்குழந்தையைப் பற்றி பேசினார்”(லூக்கா 2:38). இவ்வாறு அவரும் இயேசுவுக்குச் சாட்சியாகத் திகழ்ந்தார்.
திருமுழுக்கு யோவான் ”எனக்குப் பின் வரும் இவர் என்னைவிட முன்னிடம் பெற்றவர், ஏனெனில் எனக்கு முன்பே இருந்தார்” என்று இவரைப் பற்றியே சொன்னேன்” என உரத்தக் குரலில் சான்று பகர்ந்தார். (யோவான் 1:15)
நாமனைவரும் இயேசு பிறந்த நிகழ்ச்சியைப் பற்றிக் புகழ்ந்து, அவரது மாட்சிக்குச் சாட்சிகளாய் இருப்போம்!
அனைவருக்கும் எனது மன்றாட்டு கலந்த கிறிஸ்துமஸ் வாழ்த்துக்கள்!
அருள்தந்தை தம்புராஜ் சே.ச.