மங்கள வார்த்தை

01 அருள் மிகப்பெற்ற மரியே

அருள்

அருள் என்பதற்கு நம் தமிழ் இலக்கியத்தில் 'அன்பின் கனியென அர்த்தம். ஆங்கில அகராதியில் மகிழ்வு, இன்பம், யோகம், நன்மை எனப் பல அர்த்தங்கள் உண்டு.
தூய பவுல் அடிகளார் உரோமையருக்கு எழுதிய கடிதத்தில், "தாம் முன் குறித்து வைத்தோரை அவர் அழைத்திருக்கிறார் தான் அழைத்தோரைத் தமக்கு ஏற்புடையோராக்கி இருக்கிறார். தமக்கு ஏற்புடையோராக்கினோரைத் தம் மாட்சியில் பங்குப்பெறச் செய்தார்" (உரோ 8:30) என்கிறார்.
மனித மீட்பிற்காக கடவுள் மரியாவை முன் குறித்து அழைத்தார். மரியா கடவுளின் அருளால் முழுமையாக மாற்றமடைந்தார். எனவே அருள் மிகப்பெற்றவரே என்பது அன்னை மரியாவுக்குக் கடவுளால் வழங்கப்பட்ட தனித்துவமான ஆசீர்.
கடவுள் மரியாவைப் பொருத்தமட்டில் மிகவும் கரிசனையோடு தாராள மனதோடு பெருந்தன்மையோடு நடந்து கொண்டார். உலகில் எந்த மனிதருக்கும் கொடுக்கப்படாத பெருந்தன்மையை, அருளை கடவுள் மரியாவுக்குத் தருகிறார்.

அருள் பெற வழி

"இதோ ஆண்டவருடைய அடிமை; உமது வார்த்தையின்படியே எனக்கு ஆகட்டும்" (லூக் 138) என்று தன்னையே இறைத்திருவுளத்திற்கு அர்ப்பணித்ததால் தந்தையின் மாட்சியில் ஆட்சி செய்யும் இயேசுவைப் போல் மரியாவும் விண்ணக மண்ணக அரசியாக முடிசூட்டப்பட்டு அரியணையில் அமர்த்தப்பட்டுள்ளார்.
நம் அன்னை இறைவார்த்தையை தன் உள்ளத்தில் இருத்தி சிந்தித்தவர். தன் மகன் இயேசுவுக்கு நாள்தோறும் இறைவார்த்தையை போதித்தவர். இயேசு 12 வயதில் போதகர் நடுவில் அமர்ந்து இறைவார்த்தையை விளக்கிக் கொண்டிருந்தது இந்த உருவாக்கமே ஆகும்.
அன்னை மரி நம் தாய். ஆகவே நமக்கும் அருள் பெறும் வழிமுறைகளைத் தன் வாழ்வால் கற்றுத்தருகிறார்.
"அருள் நிறைந்தவளே" என்று ஒவ்வொரு முறையும் அன்னையை நாம் அழைக்கும்போது இறைவனின் ஆசீரைப் பெறுகின்றோம்.
இறைவனின் ஆசீர் இவ்வுலகத்தில் நாம் எப்படிப்பட்ட வாழ்க்கை வாழ வேண்டுமென்பதை அன்னை வழியாக நமக்குக் கற்றுத் தருகிறது.
அன்னையின் பெயரை உச்சரித்துக்கொண்டு, வாழ்வின் செயல்பாடுகளில் நல்லது கண்டு, துணிவுடன் கடவுளின் அரியணையை அணுகிச் செல்வோமெனில், அவர் நம்மை எல்லா நலன்களாலும் நிரப்புவார். (2 கொரி 9:8)

குழந்தைகளே கற்க நிற்க!

அன்றாடம் விவிலியத்திலிருந்து குறைந்தது ஒரு அதிகாரமாவது வாசிப்போம்.
வாசிக்கின்ற இறைவார்த்தை சுட்டிக்காட்டும் மதிப்பீடுகளை நாம் கடைப்பிடிப்போம்.
இறைவன் நம்மிடமிருந்து எதிர்பார்ப்பது என்ன என்பதை செபத்தின் உதவியால் கண்டறிந்து அதற்கேற்ப செயல்படுவோம். இவற்றைக் கடைப்பிடித்தால் அருள் வாழ்வில் நாமும் வளரலாம்.