விசுவாசத்தின் விடியல்

அ.அல்போன்ஸ் திருச்சி

மனித வாழ்க்கையின் ஆழமான ஆன்மீக அனுபவங்களில் ஒன்று விசுவாசத்தின் பயணமாகும். இந்தப் பயணம் எப்போதும் தெளிவான நம்பிக்கையுடன் தொடங்குவதில்லை, பல நேரங்களில் அது கேள்விகளாலும், தேடல்களாலும், சந்தேகங்களாலும் தொடங்குகிறது. இரவின் இருளைத் தொடர்ந்து விடியல் பிறப்பதைப் போல, மனித உள்ளத்தின் சந்தேகங்களையும் குழப்பங்களையும் கடந்து இறையருளின் ஒளியில் விசுவாசம் மலர்கிறது. இந்த உண்மையை மிக அழகாக வெளிப்படுத்தும் திருத்தூதர்களில் சிறப்பிடம் பெறுபவர் புனித தோமா திருத்தூதர்.

உயிர்த்தெழுந்த ஆண்டவரை நேரில் காணும் வரை நம்ப மறுத்தவர் என்ற அடையாளத்தால் அவர் நினைவுகூரப்பட்டாலும், அவரது வாழ்க்கை வெறும் சந்தேகத்தின் வரலாறு அல்ல. மாறாக, அது உண்மையைத் தேடிய ஒரு இதயத்தின் வரலாறு. ஆண்டவரை ஆழமாக அறிய ஏங்கிய ஒரு சீடனின் ஆன்மீகப் பயணம். “என் ஆண்டவரும் என் கடவுளும்” என்ற அவரது விசுவாச அறிக்கை, கிறிஸ்தவ வரலாற்றில் ஒலித்த மிக ஆழமான நம்பிக்கையின் குரலாக விளங்குகிறது. எனவே புனித தோமாவின் வாழ்க்கை, சந்தேகத்தின் இருளிலிருந்து விசுவாசத்தின் விடியலுக்கு மனித ஆன்மா எவ்வாறு பயணிக்கிறது என்பதை எடுத்துரைக்கும் ஒரு உயிருள்ள நற்செய்தியாகும்.

திருத்தூதர் தோமாவின் விசுவாசப் பயணம்

இயேசு கிறிஸ்துவின் பன்னிரு திருத்தூதர்களுள் தனித்துவமான இடத்தைப் பெற்றவர் புனித தோமா திருத்தூதர். உலக கிறிஸ்தவ வரலாற்றில் "சந்தேகிக்கும் தோமா" என்று அறியப்பட்டாலும், அவரது வாழ்க்கையை ஆழமாக ஆராயும்போது அவர் வெறும் சந்தேகி அல்ல; மாறாக, உண்மையைத் தேடியவர், அனுபவத்தின் மூலம் விசுவாசத்தை அடைந்தவர், இறுதிவரை சாட்சியாக வாழ்ந்தவர் என்பதும் தெளிவாகிறது. தோமாவின் வாழ்க்கை மனிதனின் ஆன்மீகப் பயணத்தின் பிரதிபலிப்பாக விளங்குகிறது. சந்தேகங்கள், கேள்விகள், தேடல்கள், அனுபவங்கள், இறுதியில் உறுதியான விசுவாசம் – இவை அனைத்தும் அவரது வாழ்வில் ஒன்றிணைந்துள்ளன. தோமாவின் பெயரும் அதன் அர்த்தமும் “தோமா” (Thomas) என்ற பெயர் அரமேய மொழியில் “இரட்டை” (Twin) என்று பொருள்படும். யோவான் நற்செய்தியில் அவர் “திதிமு” (Didymus) என்று அழைக்கப்படுகிறார்; அதுவும் கிரேக்க மொழியில் “இரட்டை” என்றே பொருள்படும் (யோவான் 11:16). இந்தப் பெயர் வெறும் உடல்ரீதியான இரட்டையரைக் குறிக்கலாம். ஆனால் ஆன்மீக ரீதியாகப் பார்க்கும்போது தோமா ஒவ்வொரு மனிதனின் உள்ளத்திலும் வாழும் இரு நிலைகளைப் பிரதிபலிக்கிறார்: விசுவாசமும் சந்தேகமும், நம்பிக்கையும் பயமும், ஒளியும் இருளும். அதனால் தோமா நம்முடைய ஆன்மீக சகோதரராகவும் தோன்றுகிறார்.

அன்பின் துணிச்சல்

லாசருவை உயிர்ப்பிக்க இயேசு யூதேயாவுக்குச் செல்லும்போது சீடர்கள் பயந்தனர். அங்கு யூதர்கள் இயேசுவைக் கொல்ல முயன்றனர். அந்த நேரத்தில் தோமா மற்ற சீடர்களிடம், “திதிம் என்னும் தோமா தம் உடன் சீடரிடம், “நாமும் செல்வோம், அவரோடு இறப்போம்” என்றார்” (யோவான் 11:16) என்று கூறினார். இந்த வார்த்தைகள் தோமாவின் ஆழ்ந்த அன்பையும் அர்ப்பணிப்பையும் வெளிப்படுத்துகின்றன. அவர் முழுமையாகப் புரிந்துகொள்ளவில்லை; ஆனால் இயேசுவை விட்டு விலக விரும்பவில்லை. விசுவாச வாழ்க்கையில் புரிதலுக்கு முன்பாக அன்பு வருகிறது என்பதை தோமா காட்டுகிறார். கிறிஸ்தவ இறையியலில் இது சீடத்துவத்தின் அடிப்படை உண்மையாகக் கருதப்படுகிறது. இயேசுவைப் பின்பற்றுவது வெற்றியின் பாதை மட்டுமல்ல; சிலுவையின் பாதையும் ஆகும்.

உண்மையைத் தேடிய சீடர்

இறுதி இரவுணவு வேளையின்போது இயேசு, “நான் போகுமிடத்துக்கு வழி உங்களுக்குத் தெரியும்” என்றார். 5தோமா அவரிடம், “ஆண்டவரே, நீர் எங்கே போகிறீர் என்றே எங்களுக்குத் தெரியாது. அப்படியிருக்க நீர் போகுமிடத்துக்கான வழியை நாங்கள் எப்படித் தெரிந்து கொள்ள இயலும்?” என்றார். 6இயேசு அவரிடம், “வழியும் உண்மையும் வாழ்வும் நானே.” (யோவான் 14:5) என்றார்.
இது அறியாமையின் கேள்வி அல்ல; உண்மையைத் தேடும் இதயத்தின் கேள்வி. பலர் புரியாததைப் புரிந்தது போல நடிக்கின்றனர்; ஆனால் தோமா நேர்மையாகக் கேட்கிறார். அவருடைய இந்தக் கேள்விக்கே பதிலாக இயேசு உலக வரலாற்றின் மிகப் பெரிய அறிவிப்புகளில் ஒன்றை வழங்கினார்: “நானே வழி, உண்மை, வாழ்வு” (யோவான் 14:6) அதாவது, தோமாவின் கேள்வி இல்லையென்றால் இந்த அற்புதமான வெளிப்பாடு நமக்குக் கிடைத்திருக்காது. கேள்வி கேட்பது விசுவாசத்திற்கு எதிரானது அல்ல; உண்மையான தேடல் விசுவாசத்தை ஆழமாக்குகிறது.

சந்தேகிக்கும் தோமா

இயேசுவின் உயிர்த்தெழுதலுக்குப் பிறகு தோமா மற்ற சீடர்களோடு இல்லை. அவர்கள், “ஆண்டவரைக் கண்டோம்” (யோவான் 20:25) என்று சொன்னபோது தோமா நம்பவில்லை.
அவர் கூறினார்: “அவருடைய கைகளில் ஆணிகளின் தழும்பைக் கண்டு, என் விரலை அவற்றில் வைத்து, என் கையை அவருடைய விலாவில் வைத்தாலொழிய நம்பமாட்டேன்.” இந்த நிகழ்வின் காரணமாகத் தோமா “சந்தேகிக்கும் தோமா” என்று அழைக்கப்படுகிறார். ஆனால் இறையியல் பார்வையில் இது நம்பிக்கையின்மை அல்ல; உண்மையான உறுதியைத் தேடும் முயற்சி.
பல சீடர்கள் இயேசுவை விட்டுத் தப்பி ஓடியபோதும் அவர்கள்மீது யாரும் “பயந்த சீடர்கள்” என்ற பெயரைச் சொல்லவில்லை. ஆனால் தோமா தனது கேள்வியை வெளிப்படையாகச் சொன்னதால் அவர் சந்தேகியின் அடையாளத்தைப் பெற்றார்.
உண்மையில், தோமா போலக் கேள்வி எழுப்பும் மனிதர்களே ஆழமான விசுவாசத்தை அடைகிறார்கள்.

“என் ஆண்டவரும் என் கடவுளும்”

எட்டு நாட்களுக்குப் பிறகு உயிர்த்தெழுந்த இயேசு தோமாவுக்கு நேரில் தோன்றினார். அவரிடம், “இதோ! என் கைகள். இங்கே உன் விரலை இடு. உன் கையை நீட்டி என் விலாவில் இடு. ஐயம் தவிர்த்து நம்பிக்கைகொள்” (யோவான் 20:27) என்று கூறினார். அப்போது தோமா கூறிய வார்த்தை:
“என் ஆண்டவரும் என் கடவுளும்!” (யோவான் 20:28) இது யோவான் நற்செய்தியின் உச்சநிலை அறிவிப்பாகும். இயேசுவை “கடவுள்” என்று மிகத் தெளிவாகவும் நேரடியாகவும் அறிக்கையிட்ட முதல் சீடர் தோமாவே. இந்த ஒப்புதல் கிறிஸ்தவ இறையியலின் இதயமாகும். இது வெறும் ஆச்சரியக் குரல் அல்ல; உயிர்த்தெழுந்த கிறிஸ்துவின் தெய்வீகத்தை ஏற்றுக்கொண்ட விசுவாச அறிக்கை.

காணாமல் நம்பும் விசுவாசம்

தோமாவின் விசுவாச அறிக்கைக்குப் பதிலாக இயேசு கூறினார்: “நீ என்னைக் கண்டதால் நம்பினாய். காணாமலே நம்புவோர் பேறுபெற்றோர்” என்றார்” (யோவான் 20:29) இது அனைத்து தலைமுறைகளின் கிறிஸ்தவர்களுக்கும் வழங்கப்பட்ட ஆசீர்வாதமாகும். நாம் இயேசுவை உடலால் காணவில்லை. ஆனால் திருவிவிலியம், திருச்சபை, திருவருட்சாதனங்கள், பரிசுத்த ஆவியின் செயல்பாடு ஆகியவற்றின் வழியாக அவரை அனுபவிக்கிறோம். தோமா தொடுதலின் மூலம் விசுவாசித்தார்; நாம் சாட்சியின் மூலம் விசுவாசிக்கிறோம்.

இந்தியாவின் திருத்தூதர்

திருச்சபை மரபின்படி புனித தோமா கி.பி. 52-ஆம் ஆண்டு இந்தியாவிற்கு வந்தார். முதலில் மலபார் கரையை அடைந்து நற்செய்தியை அறிவித்தார். பின்னர் தென்னிந்தியாவின் பல பகுதிகளில் கிறிஸ்தவ சமுதாயங்களை உருவாக்கினார்.
புனித தாமஸ் மலையில் உள்ள ஆலயம் அவரது மறைசாட்சியுடன் தொடர்புடையதாகக் கருதப்படுகிறது. அவர் கிறிஸ்துவுக்காகத் தனது உயிரை அர்ப்பணித்து மறைசாட்சியாக இறந்தார்.
இதனால் இந்தியா ஒரு திருத்தூதரின் காலடித் தடத்தைப் பெற்ற நாடாகப் பெருமைப்படுகிறது. தோமாவின் வாழ்க்கையின் இறையியல் முக்கியத்துவம்.
1. சந்தேகம் விசுவாசத்தின் எதிரி அல்ல சரியான தேடலுடன் கூடிய சந்தேகம் மனிதனை உண்மைக்கு அழைத்துச் செல்கிறது.
2. அனுபவம் விசுவாசத்தை ஆழப்படுத்துகிறது தோமா உயிர்த்தெழுந்த ஆண்டவரைச் சந்தித்தபோது அவரது வாழ்க்கை மாறியது.
3. விசுவாசம் ஒரு தனிப்பட்ட உறவு “என் ஆண்டவரும் என் கடவுளும்” என்று கூறியபோது அது தனிப்பட்ட அர்ப்பணிப்பாக இருந்தது.
4. சீடத்துவம் தியாகத்தை உள்ளடக்கியது இறுதிவரை கிறிஸ்துவுக்காக வாழ்ந்து மரித்தவர் தோமா.
5. உலகின் எல்லைகளுக்கு நற்செய்தி எருசலேமிலிருந்து இந்தியா வரை சென்ற அவரது வாழ்க்கை, நற்செய்தியின் உலகளாவிய தன்மையை வெளிப்படுத்துகிறது.

நிறைவுரை

புனித தோமா ஒரு சந்தேகியின் கதையல்ல; தேடுபவரின் கதை. அவர் கேள்வி கேட்டார், உண்மையைத் தேடினார், உயிர்த்தெழுந்த ஆண்டவரைச் சந்தித்தார், பின்னர் உலகின் எல்லைகள்வரை சென்று நற்செய்திக்குச் சாட்சியானார். அவரது வாழ்க்கை நமக்கு ஒரு பெரிய பாடத்தைக் கற்பிக்கிறது: சந்தேகத்தில் தொடங்கிய ஆன்மீகப் பயணம், கிறிஸ்துவை நேரில் சந்திக்கும்போது உறுதியான விசுவாசமாக மலர்கிறது. அதனால் ஒவ்வொரு கிறிஸ்தவரும் தோமாவோடு சேர்ந்து தினமும் இவ்வாறு ஜெபிக்கலாம்:
புனித தோமாவின் வாழ்க்கையை நாம் தியானிக்கும்போது, நமது சந்தேகங்களையும் பயங்களையும் இறைவனின் கரங்களில் ஒப்படைத்து, அவரைப் போல உறுதியான விசுவாசிகளாக வளர அழைக்கப்படுகிறோம். ஏனெனில், இரவு எவ்வளவு நீண்டதாக இருந்தாலும், இறைவனைத் தேடும் இதயத்தில் விசுவாசத்தின் விடியல் நிச்சயமாக உதிக்கும்.