மறையுரைச் சிந்தனைத் தொகுப்பு

Tamil Sunday Homily collection..

பொதுக் காலத்தின் 23-ஆம் ஞாயிறு
இரண்டாம் ஆண்டு


இன்றைய வாசகங்கள்:-
எசாயா 35:4-7அ|யாக்கோபு 2:1-5|மாற்கு 7:31-37

உங்களுக்குத் தேவையான கட்டுரையைத் தேர்வு செய்யவும்


உள்ளம் திறக்கப்படட்டும்

உயிர் இல்லா உடல் பிணம், உயிர் இருந்தும் ஐம்புலன்கள் செயல்படாவிட்டால் அவர்கள் ஜடம், ஐம்புலன்களை அதன் நோக்கில் விடுபவர் மிருகம், ஐம்புலன்களைக் கட்டி, நேர்படுத்தி, செவ்வனே பயன்படுத்துபவர் மனிதர். கண்ணிருந்தும் பார்க்க இயலவில்லையே, காதிருந்தும் கேட்க இயலவில்லையே என ஏங்கும் மனிதர்கள் ஏராளம். கண்ணிருந்தும் பார்க்காமல், காதிருந்தும் கேட்காமல் இருப்போர் எண்ணிக்கை அதைவிட அதிகம். ஐம்புலன்களைக் கொடையாகத் தந்து அதன் வழியாக இறைத் தன்மையை அடைய அழைப்பு விடுப்பது இன்றைய வாசகங்கள்.

பார்வையற்ற தன்மையையும், கேட்க இயலாத நிலையையும், பேச முடியாத தன்மையையும் இரு வகைகளாகப் பிரிக்கலாம். ஒன்று பிறப்பினாலோ, விபத்தினாலே இக்குறைபாடு ஏற்படுதல், மற்றொன்று பேச , பார்க்க, கேட்க முடிந்தும் தனக்குத் தேவையானதையும், பிடித்ததையும் மட்டும் பேசுதலும், பார்த்தாலும், கேட்டலும் ஆகும்.

முதல் வகைக் குறைபாடு உடையோர் அதிலிருந்து விடுபட அதிக ஆர்வமுடையவர்களாயும், அதற்காக இறைவனிடம் மன்றாடுபவர்களாயும் இருப்பர். இப்படிப்பட்டவர்களின் வாழ்வில் இறைவனின் வல்லமை எளிதில் செயல்படும். இரண்டாம் வகையானவரோ அதிலிருந்து எந்த வகையிலாவது மாறி விடுவோமோ என்று அஞ்சி தங்களுக்குள்ளேயே பூட்டி வைத்திருப்பர். இவர்கள்தான் உள்ளத்தில் உறுதியற்றவர்கள்.

உள்ளத்தில் உறுதியற்ற இவர்கள் திருத்தூதர் கூறுவதுபோல இனம், மொழி, வசதி, அறிவு முதலியவற்றை அடிப்படையாகக் கொண்டு பிரித்துப் பார்ப்பர். இத்தகைய தரம் பிரிப்பது என்பது அச்சத்தால், தன்னம்பிக்கை இன்மையால், தன்னிலை அறியாததால் நிகழ்வதாகும். இவ்வகையான உள்ளத்தினரை நோக்கி ஆண்டவர் தரும் கட்டளை 'திறக்கப்படு' என்பதாகும். அதாவது உள்ளம் திறக்கப்படட்டும் என்று கட்டளையிடுகிறார்.

ஆண்டவர் இயேசு இனம், மொழி, வசதி, அறிவு, பால் என்று எந்தவித வேறுபாடுகளும் பார்க்காமல் அனைவரையும் சமமாகப் பார்த்து, குணமளித்து, வாழ்வித்து, வழிகாட்டித் தன் இறைத்தன்மையை உலகறியக் காட்டுகிறார்.

வேறுபாடுகளும், ஏற்றத்தாழ்வுகளும், மனித மனப் பிளவுகளும் செயற்கையாக உருவாக்கப்பட்ட ஒன்று. இயற்கையால் நாம் அனைவரும் மனித நேயத்தோடு படைக்கப்பட்டவர்கள். அந்நிலையை நாம் மீண்டும் அடைய இயற்கையான, செயற்கையான குறைபாடுகள் நீங்க நமக்குத் தேவையான அடிப்படை குணம் அன்பு ஆகும். அன்பு என்கின்ற உயரிய பண்பில் நாம் வளரும்போது பாலை நிலத்தில் நீரூற்றுகள் பீறிட்டு எழும், வறண்ட பாலை நிலத்தில் நீரோடைகள் பாய்ந்தோடும், கனல் கக்கும் மணற்பரப்பு நீர் தடாகம் ஆகும், தாகமுற்ற தரை நீரூற்றுகளால் நிறைந்திருக்கும். ஐம்புலன்களை ஒருங்கிணைப்போம். கொடையாகப் பெறப்பட்ட சக்திகளை இறை மகிமைக்காகப் பயன்படுத்துவோம். பாரினில் நாம் அனைவரும் இறைச்சாயல்கள் என்பதில் உறுதி பெற்று இறைவனின் பிள்ளைகளாகப் பாகுபாடும், குறைகளுமற்ற வாழ்வு வாழ்வோம்.

மேலே செல்ல  அன்பின்மடல்-முகப்பு

ஊனம் மறையட்டும்

இன்றைய நற்செய்தியிலே காது கேளாதவரும், திக்கிப் பேசுபவருமான ஒருவரைக் குணமாக்கும் இயேசுவை நாம் சந்திக்கின்றோம். புதுமை நடந்ததும் அவரைச் சுற்றியிருந்தவர்கள் அளவு கடந்த வியப்பில் ஆழ்ந்தவர்களாய், இவர் எத்துணை நன்றாக யாவற்றையும் செய்து வருகின்றார்! காது கேளாதோர் கேட்கவும், பேச்சற்றோர் பேசவும் செய்கின்றாரே! என்று பேசிக்கொண்டனர் (மாற் 7:37).

அன்று புதுமைகள் செய்த இயேசு, இன்றும் நம் நடுவே வாழ்ந்து கொண்டுதானிருக்கின்றார்; புதுமைகள் செய்து கொண்டுதானிருக்கின்றார்.

இதற்கு ஓர் உதாரணம். தஞ்சை மறைமாவட்டத்திலுள்ள திருத்துறைப்பூண்டிக்குப் பக்கத்திலுள்ள ஒரு கிராமம். அக்கிராமத்திலே தாயொருத்திக்கு ஆண் குழந்தை ஒன்று பிறந்தது! ஆண்டுகள் பத்து உருண்டோடியும் சிறுவன் பேசவில்லை! எத்தனையோ மருத்துவ முறைகள்; பேச்சுப் பயிற்சிகள் எத்தனையோ! தஞ்சை, சென்னை போன்ற இடங்களிலுள்ள மருத்துவக் கல்லூரிகள்! எத்தனையோ கோயில்கள்! பாவம் அந்தச் சிறுவன் ! ஓரிரு வார்த்தைகள் கூட அவனால் பேச முடியவில்லை !

கடைசியாக அந்தச் சிறுவனின் பெற்றோருடைய கண்கள் வேளாங்கண்ணியை நோக்கித் திரும்பின. வேளாங்கண்ணிக்குச் சென்றனர். அவர்கள், மாதாவே ! மாதர்குல மாணிக்கமே ! எங்கள் குழந்தை பேச வேண்டும். உலகின் ஒளியைக் கையிலேந்தி பாருக்கெல்லாம் அருள்புரியும் அன்பு அன்னையே, அருள்புரியும் தாயே! என மெழுகென உருகி மன்றாடினர். அன்று இரவு அனைவரும் அயர்ந்து உறங்கிக்கொண்டிருந்த நேரம்! சிறுவன் திடீரென எழுந்து, அம்மா! அம்மா! என்று அலறிக்கொண்டு அறைக் கதவைத் திறந்து கொண்டு அன்னையின் பேராலயத்தை நோக்கி ஓடினான். பெற்றோர் வேளாங்கண்ணியில் ஒரு வாரம் தங்கி ஏழைகளுக்கு உணவளித்துச் சென்றனர்.

நம் ஆண்டவராம் இயேசு இன்றும் புதுமைகள் செய்துகொண்டிருக்கின்றார் என்ற உண்மை நம்மை திடப்படுத்தவேண்டும் (முதல் வாசகம்). உங்களில் ஊனம் மறைய வேண்டுமா? பாலை நிலம் சோலை நிலமாக வேண்டுமா ? மனிதம் புனிதமாக வேண்டுமா? நீங்கள் நம்பிக்கையில் செல்வராகுங்கள் (இரண்டாம் வாசகம்); அப்போது நீங்கள் தேடுவது உங்கள் வீடு தேடிவரும் என்கின்றார் இயேசு.

மேலும் அறிவோம் :

தனக்குவமை இல்லாதான் தாள்சேர்ந்தார்க்(கு) அல்லால்
மனக்கவலை மாற்றல் அரிது (குறள் : 7).

பொருள் : தன்னிகரற்ற அருளாளனாகிய இறைவன் திருவடி சேர்வோர் உள்ளத்தில் துன்ப துயரங்கள் நீங்கிவிடும். ஏனையோர் மனக்கவலை மாறாது.

மேலே செல்ல  அன்பின்மடல்-முகப்பு

”திறக்கப்படு”

ஒரு சிறுவன், "எனது தாத்தாவுக்கு நான்கு கைகளும் மூன்று காதுகளும் உள்ளன என்றான். அவன் குறிப்பிட்ட நான்கு கைகள்: வலக்கை, இடக்கை, வழுக்கை, பொக்கை. அவன் குறிப்பிட்ட மூன்று காதுகள் : வலக்காது, இடக்காது. கேட்காது.

வயதானவர்களுக்குத் தலை வழுக்கையாகவும் வாய் பொக்கையாகவும் காது மந்தமாகவும் மாறுவது இயல்பு. ஆனால் ஒரு சிலருக்குக் காது இருந்தும் அவர்கள் கேளாதவர்களாக இருப்பதுதான் வேடிக்கையாகவும் வேதனையாகவும் உள்ளது. கல்வி கேள்வியால், ஆன்றோர்களுடைய அருள்வாக்கால் துளைக்கப்படாத செவிகள் செவிட்டுத் தன்மையுடையன.

'கேட்பினும் கேளாத் தகையவே
கேள்வியால் தோக்கப்படாதசெவி" (குறள் 418)
கிறிஸ்து இம்மையில் வாழ்ந்தபோது விண்ணரசைப்பற்றிய நற்செய்தியைப் பல்வேறு உவமைகள் வாயிலாகப் போதித்தார். ஆனால் அவருடைய போதனையை மக்கள் உணரவில்லை; உணர்ந்து மனம் மாறவில்லை. அவருடைய போதனை செவிடன் காதில் ஊதிய சங்காயிற்று. எனவேதான் அவர் இறைவாக்கினர் எசாயாவை மேற்கோள்காட்டி அம்மக்களைப் பற்றிப் பின்வருமாறு கூறினார்: “இம்மக்களின் நெஞ்சம் கொழுத்துப்போய்விட்டது. காதும் மந்தமாகிவிட்டது. இவர்கள் தம் கண்களை மூடிக்கொண்டனர்." (மத் 13:15)

பாவங்களிலெல்லாம் கொடிய பாவம் கடவுளுடைய வார்த்தையைக் கேட்டாலும் இதயத்தைக் கடினப்படுத்திக் கொள்வதாகும், எனவேதான், நீங்கள் இன்று கடவுளுடைய குரலைக் கேட்டால் உங்கள் இதயத்தைக் கடினப்படுத்திக் கொள்ளாதீர்கள் என்று எச்சரிக்கிறது. திருப்பாடல் 95:8.

கடவுளுடைய வார்த்தையைக் காதால் கேட்கவும் அவருடைய புகழை நாவால் அறிக்கையிடவும் இன்றைய நற்செய்தி நம்மை அழைக்கிறது.

இன்றைய முதல் வாசகம் மெசியாவின் காலத்தில் பார்வையற்றோர் பார்ப்பர்; காது கேளாதவர் கேட்பர் என அறிவிக்கின்றது (எசா 35:4-7). இறைவாக்கினர் எசாயாவை மேற்கோள்காட்டி, தாமே வரவிருக்கும் மெசியா என்பதற்குச் சான்று அளித்தார் கிறிஸ்து; அதாவது, பார்வையற்றோர் பார்வை பெறுகின்றனர்: காது கேளாதோர் கேட்கின்றனர் (லூக் 7:22).

இன்றைய நற்செய்தியில் கிறிஸ்து, காது கேளாதவரும் திக்கிப் பேசுபவருமான ஒருவரைக் குணப்படுத்துகிறார், அவருக்குக் குணமளிக்கும் முன், அவரைக் கூட்டத்திலிருந்து தனியே அழைக்கிறார்; தம் விரல்களை அவர் காதுகளில் இடுகிறார்; உமிழ் நீரால் அவர் நாவைத் தொடுகிறார்; வானத்தை அண்ணாந்து பார்க்கிறார்; பெருமூச்சுவிடுகிறார். அதன் பிறகு, "எப்பத்தா" அதாவது "திறக்கப்படு' என்று கூறி அவரைக் கேட்கும்படியும் பேசும்படியும் செய்கிறார்,

கிறிஸ்துவின் இப்பல்வேறு செயல்கள் அருளடையாளத் தன்மை கொண்டவை, அருள் அடையாளங்கள் நம்பிக்கையின் அருள் அடையாளங்கள், அருள் அடையாளங்கள் பயனளிக்க வேண்டுமென்றால் அதற்கு நம்பிக்கை முன்னதாகவே தேவைப் படுகிறது. எனவேதான் இயேசு கிறிஸ்து பல்வேறு செயல்களின் மூலம் படிப்படியாக அம்மனிதரிடத்தில் நம்பிக்கையை வளர்த்து அதன்பிறகே அவரைக் குணப்படுத்துகிறார்,

கிறிஸ்துவின் அதே வழிமுறையைத்தான் திருச்சபையும் பின்பற்றுகிறது. ஒவ்வொரு அருளடையாளத்திலும் முதலில் அருள்வாக்கு மூலமாக நமது நம்பிக்கையை வளர்த்து அதன்பிறகே அருளடையாளச் சடங்குகளை நிறைவேற்றுகிறது. திருப்பலியிலும் அருள்வாக்கு வழிபாடு முடிந்தபின்னே நற்கருணை வழிபாடு தொடங்குகிறது.

திருமுழுக்குப் பெறுவோரின் காதையும் வாயையும் குரு தொட்டுப் பின்வருமாறு கூறுகிறார் ! *செவிடர் கேட்கவும் ஊமையர் பேசவும் ஆண்டவர் செய்தருளினார். நீர் விரைவில் அவரது வார்த்தையைக் காதால் கேட்கவும், அவ்விசுவாசத்தை நாவால் அறிக்கையிடவும் செய்தருள்வாராக."

நாம் கடவுளுடைய வார்த்தையைக் காதால் கேட்கவேண்டும், ஏனெனில் கேட்பதால்தான் நம்பிக்கை உண்டாகும், "அறிவிப்பதைக் கேட்டால்தான் நம்பிக்கை உண்டாகும்" (உரோ, 10:17), கேள்வியால் நாம் பெற்ற நம்பிக்கையை மற்றவர்களுக்கு எடுத்துரைக்க வேண்டும். "நாங்கள் கடதையும் கேட்டதையும் எடுத்துரைக்காமலிருக்க எங்களால் முடியாது" (திப 4:20) என்று துணிவுடன் கூறிய பேதுருவின் ஆர்வம் நம்மை ஆட்கொள்ள வேண்டும்.

கடவுளின் குரலைக் கேட்பவர்கள் மற்றவர்களின், குறிப்பாக, நலிவடைந்தவர்களின் குரலைக் கேட்பார்கள், மலையில் ஒருவர் பிறந்தநாள் 'கேக்' வெட்டுகிறார். அவரைச் சுற்றி இருப்பவர்கள் அவரிடம் என்ன திரைப்படப்பாடல் பாடுவார்கள் ? "மலையோரம் வீசும் காற்று, மனசோட பாடும்பாட்டு கேக்குதா, கேக்குதா!" 'கேக்குதா' என்ற சொல் காதால் 'கேக்கு தா' என்ற பொருளையும் நீங்கள் வெட்டுகிற கேக்கைத் தாருங்கள் 'கேக்குத் தா' என்ற பொருளையும் கொண்டுள்ளது ஏழைகளின் அபயக்குரல் நமக்குக் கேட்குதா?

"மாண்டவர்களுக்காக அழாதே
கூனிக் குறுகி ஏழ்மையில் இருக்கிறானே
அந்த மனிதனுக்காக இரங்கு
வாய்பேச இயலாத அந்தக் கொத்தடிமைகள்
உலகின் வேதனையைக் காண்கிறார்கள்;
தவறுகள் அவர்கள் கண்ணுக்குப் படுகிறது
ஆனால் அவர்கள் வாய் திறக்க முடியவில்லை
அந்தத் துணிச்சலும் அவர்களுக்கில்லை"
(திருமதி இந்திராகாந்தியைக் கவர்ந்த கவிதை)
துன்புறுவோரின் அபயக்குரலைக் கேட்டு ஆவன செய்யவில்லை என்றால், நாம் காது இருந்தும் கேளாத செவிடர்கள்!

நமது காதுகள் கூர்மையாக இருக்க வேண்டும். அவ்வாறே தமது பார்வையும் நேரிய பார்வையாக இருக்க வேண்டும். பணக்காரர்களை ஒருவிதமாகவும் ஏழைகளை வேறொருவிதமாகவும் பார்த்து. ஒருதலைச் சார்பாக நாம் நடக்காமல் இருக்கும்படி இன்றைய இரண்டாம் வாசகத்தில் நம்மை எச்சரிக்கிறார் புனித யாக்கோபு.

இன்றைய நற்செய்தியில், இயேசுவின் புதுமையைக் கண்ட மக்கள் "இவர் எத்துணை நன்றாய் யாவற்றையும் செய்து வருகிறார்" (மாற் 7:37) என்று வியப்படைந்தனர். கடவுள் உலகத்தைப் படைத்தபோது தாம் படைத்ததை உற்று நோக்கினார், அவர் படைத்தவை மிகவும் நன்றாக இருந்தன (தொநூ 1:31). இந்த முதல் படைப்பு பாவத்தால் சீரழிந்த நிலையில் கடவுள் தம் மகன் கிறிஸ்து வழியாக மீண்டும் உலகைப் படைக்கிறார். இப்புதுப்படைப்பு முதல் படைப்பை விடச் சிறந்ததாக உள்ளது என்ற ஆழமான இறையியல் உண்மையையும் இப்புதுமை உணர்த்துகிறது.

திருமுழுக்கினால் புதுப்படைப்பாக மாறியுள்ள நாம். கடவுளுடைய வார்த்தையைக் காதால் கேட்போம். அதன் எதிரொலியாக ஏழைகளின், ஒடுக்கப்பட்டவர்களின் குரலையும் கேட்டு அவர்களுக்கு உதவிக்கரம் நீட்டுவோம்.

மேலே செல்ல  அன்பின்மடல்-முகப்பு

செவிடாய், ஊமையாய்...

நாற்பது ஆண்டு மண வாழ்வு கண்ட அந்தக்‌ கணவன்‌ மனைவியிடையே ஒரு நாள்‌ கூட சண்டையில்லை. சச்சரவு இல்லை, ஒருவர்‌ ஒருவரோடு ஒர்‌ உரசல்‌ இல்லை, உறவு முறிவு இல்லை. உரக்கக்‌ கத்திய நினைவு இல்லை. இப்படியும்‌ மணவாழ்க்கை சாத்தியமா? என்று உங்கள்‌ புருவத்தை உயர்த்துகிறீர்களா? அப்படி அவர்கள்‌ வாழ்ந்தது உண்மைதான்‌. அதற்குக்‌ காரணம்‌ அவர்களில்‌ ஒருவர்‌ ஊமை. இன்னொருவர்‌ செவிடு. இது கதை என்ற அளவில்‌ வியக்க வைக்கும்‌!

“உன்னைத்‌ தாழ்த்திப்‌ பேசும்போது ஊமையாயிரு. உயர்த்திப்பேசும்போது செவிடனாய்‌ இரு. வாழ்வில்‌ எளிதில்‌ வெற்றி பெறுவாய்‌”. பொன்மொழி மெய்சிலிர்க்கச்‌ செய்யும்‌.

அதற்காக உடலளவில்‌ இந்த ஊனங்களை விரும்பி ஏற்றுக்‌ கொள்ள முடியுமா? கொஞ்சம்‌ கற்பனை செய்து பாருங்கள்‌. என்‌ மறையுரையைக்‌ கேட்கும்‌ உங்களில்‌ ஒருவர்‌ கேள்விப்‌ புலனற்று இருக்கிறார்‌. என்‌ உதடுகளின்‌ அசைவுகளை மட்டுமே பார்க்க முடிகிறது. உரைக்கின்ற ஒரு சொல்‌ கூட அவருக்கு காதில்‌ நுழையவில்லை. சுற்றிலும்‌ இருப்பவர்கள்‌ என்‌ மறையுரையைக்‌ கேட்டு ரசிப்பதை, வியப்பதை, சில சமயங்களில்‌ சிரிப்பதை, மகிழ்வதைப்‌ பார்க்கிறார்‌. இந்த உணர்வுகளில்‌ எதையும்‌ அவரால் வெளிப்படுத்த இயலவில்லை. தன்‌ மீதே ஒரு வித வெறுப்பு, எரிச்சல்‌, தனிமைப்‌ படுத்தப்படும்‌ விரக்தி...

ஒரு வகையில்‌ சொல்லப்போனால்‌ செவிடாக இருப்பது குருடாக இருப்பதைவிடக்‌ கொடுமையானது. கண்‌ பார்வை இழந்தவர்‌ மீது பிறருக்கு இரக்கம்‌ வரும்‌ அனுதாபம்‌ வரும்‌. காதுகேளாதவர்களோ பிறரின்‌ ஏளனத்துக்கும்‌ எரிச்சலுக்கும்‌ ஏன்‌ நகைப்புக்குமே உரியவர்களாய்‌ இருப்பார்கள்‌.

ஹெலன்‌ கெல்லர்‌ காது கேளாதவர்‌. அதே நேரத்தில்‌ பார்வை இழந்தவர்‌. “குருடாக இருப்பது செவிடாக இருப்பதை விட மோசமானது -.. எனப்‌ பலர்‌ கருதுகின்றனர்‌. என்னிடம்‌ இரண்டு ஊனங்களும்‌ இருக்கின்றன. ஆனால்‌ காது கேளாமல்‌ இருக்கின்றவருக்குத்தான்‌ அன்றாட வாழ்வில்‌ :பல கதவுகள்‌ அடைக்கப்படுகின்றன. வானொலி, தொலைக்காட்சி, உரையாடல்‌ அனைத்தும்‌ எட்டாத கனியாகி விடுகின்றன. இறுதியில்‌ கிட்டுவது புறக்கணிப்பும்‌ தனிமையுமாகும்‌”” என்று அவர்‌ கூறுகிறார்‌.

காது கேளாதவராக இருப்பது மிக மோசமானது. அதோடு. சேர்ந்து வாய்‌ பேச இயலாதவராக -திக்கிப்‌ பேசுபவராக இருந்தாலோ வாழ்வே நரகமாகிவிடும்‌. அதனால்தான்‌ வானத்தை அண்ணாந்து பார்த்து, பெருமூச்சு விட்டு அத்தகையவரை நோக்கி “எப்பத்தா” அதாவது திறக்கப்படு' (மார்க்‌. 7:34) என்றாரா இயேசு?

இயேசுவின்‌ குணப்படுத்தும்‌ இந்த ஊழியம்‌ இறைவாக்கினர்‌ எசாயா 35:4-7, 29:18, 61:1-3 போன்ற பழைய ஏற்பாட்டு பகுதிகளில்‌ முன்னுரைத்த மெசியாவின்‌ பொற்கால நிறைவாகும்‌. “உள்ளத்தில்‌ உறுதியற்றவர்களே, அநீதிக்குப்‌ பழிவாங்கும்‌ கடவுளாக வந்து உங்களை விடுவிப்பார்‌. அப்போது பார்வையற்றோரின்‌ கண்கள்‌ பார்க்கும்‌. காது கேளாதோரின்‌ செவிகள்‌ கேட்கும்‌ அப்பொழுது கால்‌ ஊனமுற்றோர்‌ மான்‌ போல்‌ துள்ளிக்குதிப்பர்‌'.

அடக்குமுறையும்‌ ஒடுக்குதலும்‌ மேலோங்கி நிற்கும்‌ எங்கும்‌ மக்கள்‌ ஊமையாக்கப்படுகிறார்கள்‌. செவிடாக்கப்படுகிறார்கள்‌. குருடாக்கப்படுகிறார்கள்‌. முடமாக்கப்படுகிறார்கள்‌. உடலளவில்‌. ஊமையாகவும்‌, செவிடாகவும்‌ குருடாகவும்‌ முடமாகவும்‌ இருப்பதைவிட இது கடினமானது. மனிதனை மனிதனாக நடத்தாத அவலநிலை! இந்தப்‌ பின்னணியில்தான்‌ மெசியா காலத்தில்‌ வரப்போகும்‌ மீட்புப்‌ பற்றி எடுத்துரைக்கிறார்‌. எசாயா. அந்த அறிவிப்பில்‌ மகிழ்ச்சியும்‌ உற்சாகம்‌ கலந்த நம்பிக்கையும்‌ தொனிக்கிறது. ஏசாயா 35:5, மார்க்‌ 7:37 இவற்றில்‌ உள்ள ஒப்புமை இதை விளக்கும்‌. எனவே எசாயா முன்னுரைத்த மெசியாவின்‌ காலம்‌ இயேசுவின்‌ காலமே என்பது மார்க்‌ உணர்த்த விரும்பும்‌ உண்மை.

காதும்‌ நாவும்‌ ஊனத்துக்கு ஆளாகிய நிலையில்‌ அவர்கள்‌ நமது பரிதாபத்துக்கோ அனுதாபத்துக்கோ உரியவர்கள்‌ அல்ல. நமது நேசக்கரங்களின்‌ அரவணைப்புக்குரியவர்கள்‌. மறைந்த மாமேதை திருத்தந்தை 2ம்‌ அருள்‌ சின்னப்பர்‌ குறிப்பிடுவது போல “அன்பு எனும்‌ மொழியை ஊமையர்களாலும்‌ பேச முடியும்‌. செவிடர்களாலும்‌ கேட்க முடியும்‌. அதனால்‌ அன்பு மட்டுமல்ல, மனித வலுவின்மையில்‌ தன்‌ வல்லமை (2 கொரி. 12:9) விளங்கச்‌ செய்கிறார்‌.

செவிடனும்‌ திக்குவாயனுமாகிய அந்த மனிதன்‌, செவியிருந்தும்‌ கேளாத, வாயிருந்தும்‌ பேசாத இன்றையக்‌ கிறிஸ்தவனின்‌ அடையாளம்‌.

“.. திருவருட்சாதனங்களின்‌ மூலமாக இயேசு இடையறாது தொட்டுக்‌ குணப்படுத்திக்‌ கொண்டு வருகிறார்‌.” (கத்தோலிக்கத்‌ திருச்சபையின்‌ மறைக்கல்வி எண்‌ 1504). அதனால்தான்‌ திருமுழுக்கின்‌ போது குருவானவர்‌ நம்‌ காதுகளைத்‌ தொட்டு அவற்றை இறைவார்த்தையைக்‌ கேட்கத்‌ திறந்துவிடும்படியாகவும்‌, நம்‌ வாயைத்‌ தொட்டு இறைவார்த்தையால்‌ பெற்ற நம்பிக்கையை அறிக்கையிடத்‌ திறந்துவிடும்படியாகவும்‌ இறைவனை நோக்கி மன்றாடுகிறார்‌.

இறையாட்சியின்‌ பொற்காலம்‌ மலர வேண்டுமா? நமது போலி நிலைப்பாடுகள்‌ ஒழிய வேண்டும்‌ என்ற திருத்தூதர்‌ யாக்கோபின்‌ குரலுக்கு செவி திறப்போம்‌. ஊனமுற்றோர்‌, வறியவர்‌, அடிப்படைத்‌ தேவைகள்‌ நிறைவு காணாமல்‌ அல்லல்‌ படுவோர்‌ மனித மாண்பு மறுக்கப்படுவோர்‌ ஆகியோர்‌ மேம்பாடுகாண இயேசுவின்‌ சாட்சிகளாய்‌ வாய்‌ திறப்போம்‌ (யாக்‌. 2:5).

சமூக வாழ்வில்‌ மட்டுமல்ல, இறை உறவில்‌ - இறை உறவின்‌ வெளிப்பாடான செப வாழ்வில்‌ ஈடுபாடு இழந்தவர்கள்‌ எல்லாரும்‌ ஆன்மீக அளவில்‌ ஊனமுற்றவர்களே! கடவுளிடம்‌ பேசும்‌ திறனற்றவர்கள்‌, கடவுள்‌ பேசுவதைக்‌ கேட்கும்‌ திறனற்றவர்கள்‌. வாழ்க்கையின்‌ எத்தனை தளங்களில்‌ நாம்‌ திறக்கப்பட வேண்டியவர்கள்‌!

செல்வத்துள்‌ செல்வம்‌ செவிச்செல்வம்‌. இது வள்ளுவர்‌ வாக்கு. வானத்தை அண்ணாந்து பார்த்து பெருமூச்சுவிட்டு இயேசு எஃபத்தா (திறக்கப்படு) என்றார்‌ (மார்க்‌ 7:34). செவித்திறன்‌ இல்லாத மனிதனின்‌ நிலை இயேசுவைப்‌ பெருமூச்சுவிட வைக்கிறது.

“கேட்கச்‌ செவியுள்ளோர்‌ கேட்கட்டும்‌'' - இயேசு தன்‌ போதனைகளை முடிக்கிறபோதெல்லாம்‌ சொல்லி வைத்த வார்த்தைகள்‌. செவி எல்லாருக்கும்‌ உண்டு. செவித்திறனும்‌ உண்டு. ஆனால்‌ நல்லவற்றைக்‌ கேட்பதற்கு நம்‌ செவிகள்‌ தயாரா என்பதுதான்‌ இயேசுவின்‌ கேள்வி.

பொய்யும்‌ புரளியும்‌ பழிச்‌ சொற்களும்‌ வன்முறை வார்த்தைகளும்‌ இச்சமூகத்தை அலைக்கழிப்பதைக்‌ காணும்பொழுது எதற்கு இந்த நாவு? எதற்கு இந்தக்‌ காது? என்று கேட்கத்‌ தோன்றுகிறது. ஆயினும்‌ கடவுள்‌ கொடுத்த இம்மாபெரும்‌ கொடைகள்‌ இல்லையென்றால்‌ உண்மையையும்‌ நன்மையையும்‌ எடுத்துரைப்பதும்‌ கேட்பதும்‌ இயலாமல்‌ போய்விடாதா? “திறக்கப்படு ” என்று சொல்லி அடைபட்டுக்‌ கிடந்த காதுகளையும்‌ கட்டப்பட்டிருந்த நாவையும்‌ திறந்து வைத்த இறைமகனின்‌ ஆற்றலைப்‌ போற்றுவோம்‌.

திறக்கப்பட வேண்டியவைகள்‌ நிறைய உள்ளன. இன்று சமூகக்‌ கொடுமைகளால்‌ பேசும்‌ திறனையும்‌ கேட்கும்‌ திறனையும்‌ இழந்து நிற்கும்‌ மக்கள்‌ ஏராளம்‌. இவர்கள்‌ விடுதலை பெறும்‌ வரை சமூக விடுதலை சாத்தியமல்ல. நற்செய்தியில்‌ வரும்‌ இயேசுவின்‌ அற்புதச்‌ செயல்பாடு ஒரு சமுதாயத்தின்‌ காதும்‌ நாவும்‌ திறக்கப்பட வேண்டி வெளிப்பட்டதாகும்‌.

அதே நேரத்தில்‌ அழிவைத்‌ தரும்‌ வார்த்தைகளை விதைக்கும்‌ நாவும்‌, பயனற்ற சொற்களைக்‌ கேட்க முனையும்‌ காதுகளும்‌ “மூடப்படுக'' என்று சொல்ல வேண்டியது அவசியம்‌. இல்லையென்றால்‌ இறைவன்‌ கொடுத்த இந்த அரிய கொடைகளின்‌ நோக்கம்‌ நிறைவேறாது. இவை தீமையின்‌ கருவிகளாக மாறிவிடக்கூடும்‌.

இறைவன்‌ நம்மைப்‌ பார்த்து இன்று சொல்லும்‌ வார்த்தை : 'திறக்கப்படு'. செவிகள்‌ மட்டுமல்ல, இதயங்களும்‌ கூடத்தான்‌!

மேலே செல்ல  அன்பின்மடல்-முகப்பு
மேலே செல்ல  அன்பின்மடல்-முகப்பு

யாவற்றையும் நன்றாக!

'என் நெஞ்சே! நீ ஆண்டவரைப் போற்றிடு!
ஆண்டவர் ஒடுக்கப்பட்டோருக்கான நீதியை நிலைநாட்டுகின்றார்
... ... ஆண்டவர் பார்வையற்றோரின் கண்களைத் திறக்கின்றார் ... என் நெஞ்சே ஆண்டவரைப் போற்றிடு!' (திபா 146)

ஆண்டவர் யாவற்றையும் நன்றாகச் செய்கிறார். அவர் நமக்கு யாவற்றையும் நன்றாகச் செய்வதால், நாமும் யாவற்றையும் நன்றாகச் செய்ய அழைப்பு பெறுகின்றோம்.

முதல் வாசகம் (எசா 35:4-7), முதல் எசாயா (அதி 1-39) எனப்படும் பகுதியிலிருந்து எடுக்கப்பட்டுள்ளது. எசா அதி. 35இல் நாம் ஆண்டவரின் நீதியையும் இரக்கத்தையும் ஒருசேரக் காண்கின்றோம். மூன்றாம் திக்லெத்-பிலேசர் என்னும் அசீரிய அரசர் இஸ்ரயேல் மக்களை அடிமைகளாகச் சிறைப்பிடிக்கின்றார். அசீரியாவின் படையெடுப்பிற்கான ஆண்டவரின் பதிலிறுப்பாக அமைகிறது எசாயா 35. இந்த அதிகாரத்தை இரு பிரிவுகளாகப் பிரிக்கலாம்: (அ) ஆண்டவரின் வெளிப்பாடு அல்லது ஆண்டவர் தன்னை வெளிப்படுத்துதல் (35:1-6)ளூ (ஆ) மக்கள் மீண்டும் திரும்பி வருதல் (35:7-10). நிலம் மீண்டும் வளமை பெறுகின்றது. தண்ணீர் வளமையின் அடையாளமாக இருக்கிறது.

நம் வாசகப் பகுதி இரு பிரிவுகளாக அமைந்துள்ளது: (அ) 'அஞ்சாதிருங்கள்' (35:4), (ஆ) நிலம் பெறுகின்ற மாற்றம் (35:5-7). 'உள்ளத்தில் உறுதியற்றவர்கள்' என்னும் பதம் எபிரேயத்தில், 'பந்தயக் குதிரைகள் போல ஓடும் இதயங்களைக் கொண்டவர்களே' என்று உள்ளது. பந்தயக் குதிரை மிக வேகமாக ஓடக் கூடியது. அந்த அளவுக்கு நம் இதயம் துடித்தால் அல்லது உள்ளம் ஓடினால் எப்படி இருக்கும்? கலக்கம், முடிவெடுக்க இயலாத நிலை, பயம் ஆகியவற்றை இது குறிக்கிறது. அசீரியப் படையெடுப்பு இத்தகைய தாக்கத்தை இஸ்ரயேல் மக்கள்மேல் ஏற்படுத்தியிருந்தது. 'இதோ உங்கள் கடவுள்' என்னும் சொல்லாடல், எசா 7:14இல் ஆண்டவராகிய கடவுள் ஆகாசு அரசனுக்கு வழங்கிய, 'இம்மானுவேல் - கடவுள் நம்மோடு' என்னும் அடையாளத்தின் வெளிப்பாடாக அமைகின்றது. கடவுள் 'பழிதீர்க்க வருகின்றார்.' பழிதீர்த்தல் என்பது கடவுள் நிலைநாட்டும் நீதி அல்லது, கடவுள் அநீதியைக் கண்டுக்கும் முயற்சி என்று பொருள்கொள்ளப்படலாம்.

தொடர்ந்து ஆறு வார்த்தைப் படங்களை எசாயா பயன்படுத்துகின்றார்: 'பார்வையற்றோர்,' 'காது கேளாதோர்,' 'காலூனமுற்றோர்,' 'வாய் பேசாதோர்,' 'நீரூற்றுகள்,' மற்றும் 'கனல் கக்கும் மணல் பரப்பு.' மேற்காணும் இந்த ஆறு வார்த்தைப் படங்களும் இஸ்ரயேல் மக்களை உருவகமாகக் குறிக்கின்றன: 'ஆண்டவரின் உடனிருப்பைப் பார்க்க இயலாதவர்களாக அவர்கள் இருந்தனர்,' 'அவரின் வல்ல செயல்கள் பற்றி அவர்கள் கேட்கவில்லை,' 'அடிமைத்தனத்தால் முடமாகிக் கிடந்தனர்,' 'உள்ளக் கசப்பால் வாய்பேசாமல் இருந்தனர்,'

'ஆண்டவர் இல்லாததால் நீரூற்றுகள் வற்றிப் போயின,' 'உயிர் இல்லாததால் மணல் பரப்பு கனல் கக்கியது.' ஆண்டவராகிய கடவுள் இப்போது இறங்கி வருகின்றார். அவரின் வருகை இஸ்ரயேல் மக்கள் வாழ்க்கையில் தலைகீழ் மாற்றத்தைக் கொண்டு வந்து, பழைய நிலைக்கு அவர்களைத் திருப்புகிறது: 'பார்வையற்றவர்கள் பார்க்கின்றனர்,' 'காதுகேளாதோர் கேட்கின்றனர்,' 'காலூனமுற்றோர் நடக்கின்றனர்,' 'வாய் பேசாதோர் பாடுகின்றனர்,' 'நீரூற்றுகள் பொங்கி எழுகின்றன,' 'கனல் கக்கும் மணல் பரப்பு நீர்த்தடாகமாகிறது.' கடவுளின் முன்னெடுப்பும் நன்மைத்தனமும் இரக்கமும் முந்தைய நன்னிலைக்கு அவர்களைக் கொணர்கிறது. கடவுள் அனைத்தையும் நல்லதெனச் செய்கிறார். ஏனெனில், அவரே படைப்பின் தொடக்கத்தில் அனைத்தையும் நல்லதெனக் கண்டார் (காண். தொநூ 1:31).

இரண்டாம் வாசகம் (யாக் 2:1-5) யாக்கோபின் குழுமத்தில் நிலவிய பாரபட்சம் அல்லது வேற்றுமை பாராட்டுதல் பற்றிச் சொல்கின்றது. இத்திருமுகத்தின் ஆசிரியர் திருத்தூதரும், இயேசுவின் சகோதரரும், எருசலேம் திருஅவையின் தலைவருமான யாக்கோபு என்று குறிப்பிடப்பட்டாலும், யாக்கோபின் பெயரில் பிந்தைய காலத்தில் ஒரு யூதக் கிறிஸ்தவர் இதை எழுதியிருக்க வேண்டும் என்பதே பரவலான கருத்து. கடந்த வார வாசகத்தில், 'மேலான சமய வாழ்வு' பற்றிப் பேசிய ஆசிரியர், இந்த வாரம், 'குழும வாழ்வில் உள்ள பாகுபாடு பாராட்டுதல்' பற்றிப் பேசுகின்றார்.

யாக்கோபின் குழுமத்தில் செல்வந்தர்கள் மதிக்கப்பட்டனர், ஏழைகள் உதாசீனப்படுத்தப்பட்டனர். இதுதான் சூழல். எபிரேயத்தில் 'ஆசீர்' என்றால் 'செல்வம்' என்று பொருள். தமிழில், 'ஆசீர்' என்பதற்கு 'கடவுளின் அருள்' என்ற பொருளும் உண்டு. ஆக, அன்றைய காலத்தில் செல்வம் என்பது கடவுளின் வரம் அல்லது அருள் என்றும், ஏழ்மை என்பது கடவுளின் சாபம் என்றும் கருதப்பட்டது. செல்வந்தர்கள் சமூகத்தில் தாக்கத்தை ஏற்படுத்துபவர்களாகவும், இன்றியமையாதவர்களாகவும், தங்களுடைய நடை, உடை, அணிகலன்களால் மற்றவர்களை ஈர்க்கிறவர்களாகவும் இருந்தனர். ஆனால், ஏழைகளோ சமூகத்தில் எளிதில் காயப்படுத்தப்படுகிறவர்களாகவும், தூக்கியெறிப்படுகிறவர்களாகவும், பார்ப்பதற்கு அறுவறுப்பாகவும் இருந்தனர். செல்வந்தர்-ஏழைகள் பாகுபாடு சமூகத்தில் இருந்ததுபோல நம்பிக்கையாளர் குழுமத்திலும் இருக்கின்றது. செல்வந்தர்களுக்கு முதன்மையான இருக்கைகள் வழங்கப்பட, ஏழைகளோ வெளியே நிறுத்தப்படுகின்றனர். இதைக் கேள்விப்படுகின்ற ஆசிரியர் கோபம் கொள்கின்றார்.

'பாகுபாடு பாராட்டுவது' என்பது 'தீர்ப்பிடுவதற்கு' சமம் என்கிறார் ஆசிரியர். ஏனெனில், நாம் மனத்தில் இடும் தீர்ப்பே வெளியே செயலாக வெளிப்படுகின்றது. கடவுள் ஏழையரின் நிலையை உயர்த்தியுள்ளார் என்றும், அவர்கள் செல்வத்தில் ஏழைகளாக இருந்தாலும் நம்பிக்கையில் செல்வந்தர்கள் என்றும், நம்பிக்கையாளர் என்ற நிலையில் அனைவரும் சமமே என்றும் தன் குழுமத்திற்கு அறிவுறுத்துகின்றார். இவ்வாறக, கடவுள் அனைத்தையும் நன்றாகச் செய்துள்ளார் என்று ஆசிரியர் அவர்களுக்கு நினைவூட்டுகின்றார்.

நற்செய்தி வாசகம் (மாற் 7:31-37) மாற்கு நற்செய்தியில் மட்டுமே உள்ளது. இதை அறிகுறி அல்லது வல்ல செயல் என்று பார்ப்பதை விட, உருவகம் அல்லது உவமை என்று பார்க்கலாம். மூன்று விடயங்கள் இங்கே கவனத்திற்குரியவை: (அ) மெசியா இரகசியம் - தான் நிகழ்த்திய வல்ல செயல் பற்றி யாருக்கும் சொல்ல வேண்டாமென இயேசு கற்பிக்கின்றார். (ஆ) திக்கிப் பேசுதல் - இயேசுவிடம் கூட்டி வரப்படுகிறவர் திக்கிப் பேசுகிறார் – அவர் முழுமையான ஊமையும் இல்லை, நன்றாகப் பேசக்கூடியவரும் இல்லை. பாதி-பாதி நிலையில் இருந்தவர். இயேசுவுடன் இருந்த சீடர்களின் நிலையும் மாற்கு நற்செய்தியில் அப்படித்தான் இருக்கிறது. இயேசுவை முழுமையாக அவர்கள் இறைமகன் என்று ஏற்றுக்கொள்ளவில்லை. அதே வேளையில் அவரை நிராகரிக்கவும் இல்லை. (இ) புறவினத்து மக்கள் கூட்டத்தினர் இயேசுவைக் கண்டு வியந்து ஆர்ப்பரிக்கின்றனர். ஆனால், அவருடன் இருந்த யூதச் சீடர்கள் அவரைப் பற்றி இடறல்பட்டனர், அல்லது அவரைப் புரிந்துகொள்ள இயலாமல் இருந்தனர்.

'தீர், சீதோன், தெக்கப்போலி' போன்ற நகரங்கள் புறவினத்தாரின் குடியேற்றப் பகுதிகளாக விளங்கின. காதுகேளாதவரும் திக்கிப் பேசுகிறவருமான ஒருவரை மற்றவர்கள் இயேசுவிடம் கூட்டி வருகின்றனர். இயேசுவின் பதிலிறுப்பை ஆறு வினைச் சொற்களால் பதிவு செய்கின்றார் மாற்கு: 'கூட்டத்திலிருந்து தனியே அழைத்து,' 'விரல்களைக் காதுகளில் இட்டு,' 'எச்சில் உமிழ்ந்து,' 'நாக்கைத் தொட்டு,' 'பெருமூச்சுவிட்டு,' 'திறக்கப்படு என்று கட்டளையிட்டார்.' இயேசு மூன்று நிலைகளில் செயலாற்றுகின்றார்: (அ) தன் சமகாலத்து மருத்துவர்கள்போல எச்சில் உமிழ்ந்து பூசுகின்றார், (ஆ) ஒரு சராசரி மனிதன் போல பெருமூச்சுவிட்டு இறைவனிடம் மன்றாடுகின்றார், மற்றும் (இ) கடவுள் போல, 'திறக்கப்படு' என்று கட்டளையிடுகின்றார். 'உடனே' வல்ல செயல் நடந்தேறுகிறது. அவர் கேட்கவும் பேசவும் செய்கின்றார். 'இதை யாருக்கும் சொல்ல வேண்டாம்' என இயேசு கட்டளையிடுகின்றார். ஏனெனில், வல்ல செயல் என்பது இறைவனின் தனி அனுபவம். 'இவர் எத்துணை நன்றாக யாவற்றையும் செய்து வருகிறார்!' என்று கூட்டம் அக்களிக்கிறது. திருத்தூதர்களும், 'இயேசு சென்றவிடமெல்லாம் நன்மை செய்துகொண்டே சென்றார்' என்று அறிக்கையிடுகின்றனர் (காண். திப 10:38). காது கேளாதோர் கேட்கவும், பேச்சற்றோர் பேசவும் என்னும் சொல்லாடல்கள், இயேசுவின் சீடர்கள் வாய்திறந்து அவரைப் பற்றி அறிக்கையிடுவார்களா? இந்நிகழ்வு பற்றி வாசிக்கும் வாசகரின் இதயமும் திறக்கப்படுமா? என்னும் கேள்விகளை எழுப்புகின்றது.

இயேசு அனைத்தையும் நன்றாகச் செய்கின்றார்.

முதல் வாசகத்தில், கடவுளின் நன்மைத்தனம் அவருடைய நீதி மற்றும் இரக்கத்தில் வெளிப்படுகின்றது. கடவுளே மாற்றத்தை முன்னெடுக்கின்றார். முந்தைய நன்னிலைக்கு நாட்டையும் மக்களையும் கொண்டுவருகின்றார்.

இரண்டாம் வாசகத்தில், கடவுள் ஏழையரை நம்பிக்கையில் செல்வராக்குவதன் வழியாகவும், அவர்களின் நிலையை உயர்த்தி வாக்களிக்கப்பட்ட அரசை உரிமைப் பேறாகவும் தருவதன் வழியாகவும் தன் நன்மைத்தனத்தை வெளிப்படுத்துகின்றார்.

நற்செய்தி வாசகத்தில், மக்கள் இயேசுவிடம் விண்ணப்பம் செய்ய, இயேசுவும் அவர்களுக்குச் செவிகொடுக்கின்றார். மனித நிலையிலிருந்து இறைநிலைக்குக் கடந்து செயல்படுபவராக இருக்கிறார் இயேசு. மக்கள் இயேசுவை மெசியா என அறிக்கையிடுகின்றனர். மக்களின் வாயும் திறக்கப்படுகின்றது.

இன்றைய இறைவார்த்தையை நாம் எப்படி வாழ்வது?

இன்று உள்ளம் உறுதியற்றவர்களாக நாம் இருக்கக் காரணம் என்ன? நம்மைச் சூழ்ந்துள்ள பயங்கள் எவை? நம் வாழ்வில் நாம் மீண்டும் திரும்ப வேண்டிய பழைய நன்னிலை எது?

நான் மற்றவர்களை பாலினம், சாதி, மதம், மற்றும் பொருளாதார நிலை அடிப்படையில் பிரித்துப் பார்க்கிறேனா? நாம் ஏழைகளை மதிக்க வேண்டும். அவர்களுக்கு ஒன்றைச் செய்யுமுன், 'இதை நான் உங்களுக்குச் செய்யட்டுமா!' என்று அனுமதி கேட்க வேண்டும். ஏழைகளின் மாண்பு மனித மாண்பு என்கிறார் திருத்தந்தை பிரான்சிஸ்.

இயேசு எனக்கு அருகில் வரும்போது நான் அவரைக் கண்டுகொள்கிறேனா? அவரிடம் சென்று என் குறையை எடுத்துரைக்கின்றேனா? மற்றவர்களின் குறைகளுக்காகப் பரிந்து பேசுகிறேனா? 'அவர் யாவற்றையும் நன்றாகச் செய்துள்ளார்' என்று அவரைப் பற்றி அறிக்கையிடுகிறேனா? கடவுள் அனைத்தையும் நன்றாகச் செய்துள்ளார் எனில், நானும் அனைத்தையும் நன்றாகச் செய்யலாமே!

இறுதியாக,

அனைத்தும் நன்றாக இருக்கின்றன. ஏனெனில், ஆண்டவரின் இரக்கமும் நீதியும் நம்மோடு இருக்கின்றன. தீமையை யார் வேண்டுமானலும் செய்ய இயலும். ஆனாலும், யாவற்றையும் நன்மையாக நம்மால் மட்டுமே செய்ய இயலும். நம்மைக் காண்கின்ற மற்றவர்கள், 'அவர் அனைத்தையும் நன்றாகச் செய்துள்ளார்' என்று சொல்கிறார்கள் எனில், யாவற்றையும் நன்றாகச் செய்கின்ற கடவுள் நம்மோடு இருக்கின்றார்!

மேலே செல்ல  அன்பின்மடல்-முகப்பு

இயேசுவால் தொடப்பட விருப்பமா?

தொடுதல் என்பது அன்பின் மற்றொரு பரிமாணம். அத்தொடுதல் உடலால் உணரப்படுவது அல்ல. உள்ளத்தால் உணரப்படுவது. ஒருவரின் அன்பான சொல், செயல், உடனிருப்பு நமது மனதைத் தொட்டு அம்மனதில் புதைந்துள்ள துயரங்களை நீக்கி நலமளிக்கும். மனிதரின் தொடுதலுக்கு இவ்வளவு வல்லமை உண்டென்றால் ஆண்டவர் இயேசுவின் தொடுதலின் வல்லமையை வார்த்தைகளால் விளக்க முடியுமா? விவிலியத்தில் பல இடங்களில் நோயாளிகள் இயேசுவால் தொடப்படக் காத்திருந்தனர் என்ற செய்தி நமக்குத் தரப்பட்டுள்ளது. இன்றைய நற்செய்தியில் இயேசு செவித்திறன் மற்றும் பேச்சுத்திறன் இல்லாத ஒருவரை குணமாக்குகிற நிகழ்வை நாம் தியானிக்கிறோம்.

முதலில் இயேசு அம்மனிதரின் காதுக்குள் தன் விரலை இடுகிறார். அவரின் காதுகளில் ஏற்பட்ட அடைப்புகளை இயேசுவின் விரல் ஊடுருவி நீக்குகிறது. பல வேளைகளில் நாம் காதிருந்தும் செவிடர்களாக வாழ்கிறோம். இறைவார்த்தையையும், சக மனிதர்களின் துயரையும் கேட்க இயலாத அளவிற்கு நம்முடைய காதுகளைமட்டுமல்லநம் இதயத்தையும் நமது சுயநலமும் உலக மாயைகளும் அடைத்துக்கொண்டுள்ளன. இவ்வடைப்புகளை இயேசுவின் குரல் ஊடுருவி நீக்குமாறு நாம் அவரை அணுகிச்செல்ல வேண்டும் என்ற உண்மையை அச்செயல் நமக்கு விளக்குகிறது.

அதே போல இயேசு அம்மனிதருடைய நாவைத் தொட்டு அவரைப் பேசச் செய்கிறார். இறைவார்த்தையை உரக்க அறிவிக்கவும், ஒடுக்கப்பட்டவருக்காக குரல் எழுப்பவுமே நமக்கு நாவு தரப்பட்டுள்ளது. ஆனால் பிரச்சினைகளை எதிர்கொள்ளத் தயங்கி பயத்தினால் நாம் ஊமைகளாக, பேச திறன் இல்லாதவர்களாக, இருந்துவிடுகிறோம். இயேசு தன்னுடைய பணிவாழ்வில் தந்தையின் அன்பை உரக்கச் சொன்னார். அத்தோடு ஒடுக்கப்பட்ட மக்களின் உரிமைக்காகப் பேசினார். அவருடைய வாழ்வால் நாம் தொடப்பட வேண்டும். நமது பேச்சுத்திறனை பிறர் நலனுக்காகவும் இறைவனைப் புகழவும் பயன்படுத்த வேண்டும் என்ற ஆழமான செய்தியை இந்நிகழ்வு எடுத்துக்காட்டுகிறது.

இன்று நாம் ஆசிரியர் தினவிழாவைக் கொண்டாடுகிறோம். ஆசிரியப்பணி என்பது மிகவும் உயரிய பணி. அறியாமையையும் மூடத் தனங்களையும் அகற்றுகின்ற பணி. இயேசு சிறந்த ஆசிரியராக விளங்கினார். அவருடைய வாழ்வும் போதனையும் பல வாழ்வியல் பாடங்களைக் கற்றுத்தந்தது. மூடிக்கிடந்த காதுகளையும் வாய்களையும் அவருடைய போதனை தொட்டு கேட்கவும் பேசவும் வைத்தது. பேசப் பயந்திருந்த சீடர்கள் நற்செய்தி அறிவிக்கத் தொடங்கியது இயேசுவாலேயே.

ஆம் அன்புக்குரியவர்களே இயேசுவைப் போல நம்முடைய வாழ்வாலும் பணிகளாலும் சொற்களாலும் இருத்தலாலும் நல்லாசிரியப் பணி செய்து ஒடுக்கப்பட்டோரின் குரலைக் கேட்கவும் அவர்களுக்காக வாய்திறந்து பேசவும் ஒருவருக்கொருவர் உதவி செய்ய நாம் கடமைப்பட்டுள்ளோம். இறைவார்த்தை மூலமும் இறை அனுபவங்கள் மூலமும் இயேசு நம் காதுகளையும் நாவையும் தொட அனுமதிப்போம். அதே பணியை நாமும் பிறருக்கு செய்வோம். அதற்கான அருள் வேண்டுவோம்.

இறைவேண்டல்
அன்பு இயேசுவை உமது வார்த்தைகளையும் ஒடுக்கப்பட்டோரின் குரலையும் கேட்க எங்கள் காதுகளைத் திறந்தருளும். உம் வாக்கை உரைக்கவும் உரிமைக்குக் குரல் கொடுக்கவும் எங்கள் நாவுகளைத் திறந்தருளும். ஆமென்.

மேலே செல்ல  அன்பின்மடல்-முகப்பு
ser
மேலே செல்ல  அன்பின்மடல்-முகப்பு